ඕ ලෙවෙල් ටියුෂන් 1

අපේ අක්කාලාගේ දරුවෝ ටියුෂන් යන්න පටන් ගත්තේ ඉස්කෝලේ යන්නත් කලින් ඉඳන් මට හිතෙන්නේ , දැනටම ටියුෂන් පන්ති හතර පහකටම යනවා. තව කාලයක් යනකොට මොන විදියේ තත්වයක් ඒවිද කියලා හිතාගන්නත් බෑ මට නම් . ඉස්කෝලේ ගුරුවරු විෂය බාගෙට උගන්නලා ඉතුරු ටික දැන ගන්න එයාගේ ටියුෂන් එකට එන්න කියනවා කියලා මං අහගන අක්කලාගේ ළමයි කියනවා. තව කාලයක් යනකොට ඉස්කෝලේ පීරියඩ් එකට පන්තියට  ඇවිල්ල ගුරුවරු ළමයි මං  මේ කරන්නේ ටියුෂන් එකේදී උගන්නන්න තියන ටික කියල ටියුෂන් ෆී එක ඉස්කොලේදීම ගත්තත් පුදුම වෙන්න දෙයක් නෑ . ළමයින්ගේ වෙලාවත් ඉතුරුයි එතකොට. මම දැක්කා FB එකේ පොස්ට් එකක් එහෙම කරන ගුරුවරු ගැන කම්ප්ලේන් කරන්න නම්බර් එක්ක දීල තියනවා. මටත් එහෙම අසාධාරණයක් වුනා කියලා මතක් වුන නිසා තමයි මේක ලියන්නත් හිතුනේ. අපිට එහෙම කොච්චර වුනත් ගුරුවරුන් ට එරෙහිව මොනවත් කියන්න තරම් ධයිර්යයක් අපිට තිබුනේ නෑ ඒ කාලේ . ගුරු ගව්රවය කියන එක තිබුනා චුට්ටක් හරි.

මං  මුලින්ම ටියුෂන් පන්තියකට  ගියේ  නමය පන්තියේදී  ඉංග්‍රීසි වලටයි ගණිතයටයි. අටේ පන්තියේදී මං ටිකක් ඉගනීමට දුර්වල නිසා ගණන් වලට ටියුෂන්  පංතියකට යන්න හිතුවා. අටේ පන්තියේදී අපිට හරියට ගුරුවරයෙක් හිටියේ නැහැ ගණන් වලට සිංහල උගන්නපු සර්ම තමයි ගණනුත් ඉගැන්නුවේ , මට නම් මෙලෝ මල දානයක් තේරුනේ නෑ , ගණන් වලට විසි ගණනක් ගත්තෙත් මං මාර අමාරුවෙන්. විද්‍යාවත් එහෙමම තමයි හිටපු මිස් ආහාර දාම පාඩම මාස ගානක් ඉගැන්නුවා අන්තිමට එයාට යැපෙන්නා කියලා නමකුත් වැටුනා එක නිසා . මං  හිතන්නේ විද්‍යාව පොතෙන් කාලක්වත් ඉගන ගත්තේ නෑ අපි අවුරුද්දටම. අපේ අයියා වගේ උසස් පෙළට සයන්ස් කරන්න හිතාගන හිටියත් නමය වසරට එනකොට ඒක නිකන් හීනයක් වුනා මොකද මං ගණන් වලටයි විද්‍යාවටයි දෙකටම සැහෙන්න දුර්වල වෙලා හිටපු නිසා. ඉංග්‍රීසි වලටත් වැඩිපුර කරේ කොපි රයිටින් ලියන එක . ඒ ඉංග්‍රීසි වලට හිටපු ගුරුවරු නම් වස කම්මැලි අය අපිට මොකක් හරි වැඩක්  දීල එයාලා එයාලගේ වැඩක් කරගත්තා . ඉස්කෝලෙන් දුන්න ඉංග්‍රීසි පොත්වල තිබුනේ මොනවද කියලවත් අපි දන්නේ නෑ.

හැබැයි නමය වසරේදී ස්කෝලෙට අලුතෙන් ගුරුවරු ටිකක් ආවා ගණන් වලට ආපු භද්‍රා  මිස් බොහොම හොඳට ඉගැන්නුවා . ඒ අතරේ මං ටියුෂන් එහෙකටත් යන්න පටන් ගත්තා, ඒ මොහාන් සර්ගේ  ටියුෂන් පන්තියක් කිව්වට ඒක පොඩි මඩුවක තිබුනේ පිට ලෑලි වලින් බංකු හදලා , වැස්ස වෙලාවට ළමයි කුඩ ඉහල ගන්නවා නැත්තම් තෙමෙන්නේ නැති තැනක් හොයාගන ගිහින් වාඩි වෙන්න වෙනවා. දවසට රුපියල් 10යි  ගත්තේ. එකෙත් මට මාසෙක ෆ්‍රී කාඩ් එකක් හම්බුනා ගානක් හරියට හදලා ඉස්සෙලාම පෙන්නලා. එකම වැරැද්ද තිබුනේ සර්ගේ පැමිණීම අඩුයි . ඒ කාලේ දැනුම් දෙන්න විදියකුත් තිබුනේ නැහැනේ කලින්, අපි ඉතින් ගිහින් බලන් ඉඳලා වෙලාව පහුවෙනකොට සර් ආවේ නැත්තම් ආපහු යනවා .  යන්නේ ඉතින් බෝල ගහන්න. නමයේදී ඉතින් මං ගණිතයට සැහෙන්න දක්ෂ වුනා සර්ටයි මිස්ටයි පින් සිද්ධ වෙන්න ලකුණු 95ට වඩා තිබුනා වාර තුනේම.
එත් විද්‍යාවට අපිට හරි ගුරුවරයෙක් හිටියේ නෑ නමය  පන්තියේදීත් වෙන විෂයකට ආපු සර් කෙනෙක් විද්‍යාව ඉගැන්නුවත් ඒක හරිම නීරස වුනා. එයා ඉටි පන්දම්  දැල්ල බෝර්ඩ් එකේ ඇඳගන දවස් ගානක් ඒක ඉගැන්නුවා. ඉටි පන්දම්  දැල්ල දකිනකොටත් මට තරහයි ඒ කාලේ. නමය වසරේ අන්තිම කාලේ අලුතෙන් ආපු ඉන්දික සර් අපිට විද්‍යාව උගන්නන්න පටන් ගත්තට එයාට දෙයක් කරන්න තරම් කාලයක් තිබුනේ නෑ .එත් විද්‍යාවට ආසාවක් ඇති කරන්න එයාට පුළුවන් වුනා ඒ ටික කාලෙන්. කැම්පස් අවුට් වුන ගමන් නිසා සර් හරිම ආකර්ශනීය විදියට ඉගැන්නුවා. අකුරු ලිව්වෙත් කැම්පස් එකේ බෝඩ් ලියන ෆොන්ට් එකෙන්.