පැට්‍රොල් මැක්ස් නැත්තම් පෙට්‍රෝමැක්ස් ලාම්පුවට අපි කියන්නේ ලයිට් එක කියලා. ගෙදරට ලයිට් ගන්න කලින් විශේෂ දවසකට විතරයි ලයිට් එක පත්තු කරේ , සාමාන්‍ය දවසට චිමිනි ලාම්පු දෙකකුත් කුප්පි ලාම්පු දෙකකින් ගෙදර එලිය වුනේ. හවස් වේගන එනකොට මම නැත්තම් නංගිගේ අනිවාර්ය රාජකාරියක් වුනේ ලාම්පු පත්තු කරන එක. තෙල් මදි ඒවාට අලුතෙන් ලාම්පු තෙල් දාල චිමිනි ලාම්පු වල දැලි බැඳිලා නම් සුද්ද කරන්න වෙනවා . හුඟක් වෙලාවට ලම්ම්පු තෙල් ඉවරයි කියල දැන ගන්නෙත් ඒ වෙලාවට . අම්මගෙන් බැනුමුත් අහගන කඩේ යන්න වෙනවා ඒ වෙලාවට ඔක්කොම පැත්තක තියලා. කම්මැලි කමට අපි පත්තර කොලේකින් පිහිදානවා චිමිනියේ ඇතුල , එත් දවස් දෙක තුනකට සැරයක් සබන් දාල හේදුවේ නැත්තම් ලාම්පුවේ එලිය අඩු වෙනවා,
වැඩිපුරම චිමිනි බිඳ ගන්නේ අපේ පීල්ලට ගිහින් හෝදන කොට තමයි. බිත්තර කටුවක් වගේ හින්ද චිමිනියේ වීදුරුව ඒක බිඳෙන්න ඇත වැදුනත් ඇති හයියෙන්, චිමිනිය සම්පුර්ණ බිඳුනේ නැත්තම් තව ටිකක් කල් අපි පාවිච්චි කරනවා යට පැත්තෙන් බිඳුනොත් එතනට කාර්ඩ් බෝඩ් කෑල්ලක් සෙලෝ ටේප් වලින් අලවලා පාවිච්චි කරනවා උඩින් බිඳුනොත් නම් මුකුත් රෙපෙයාර් කරන්න බෑ රස්නෙට ගිනි ගන්න නිසා. චිමිනියේ කෑලි අඩුයි නම් දැලි බැඳෙන වත් වැඩියි. එතකොට දවස් ගානේ හෝදන්නත් වෙනවා, කැඩිච්ච චිමිනි හෝදන එක ඊටත් වඩා අමාරු වැඩක් වීදුරුවට අත කපාගන්නේ නැතුව සුද්ද කරන එක වෙනම ඉගන ගන්න ඕන. රෑට ස්කොලේ වැඩක් කරන්න තියනවා නම් ලාම්පු පත්තු කරන එක අදාළ කෙනා කරන්න වෙනවා නැත්තම් ලාම්පුවක් අයිති කරගන්න ගෝරියක් දාගන්න වැඩක්.
චිමිනි ලාම්පුවේ ගාව තණකොළ පෙත්තෙක් නැති වෙන්නේ කලාතුරකින් එහෙම නැත්තම් සලබයෙක් හරි චිමිනියේ රස්නේ නැති හරියේ වහලා ඉන්නවා . පුළුවන් උන් අරන් දැම්මට හුඟක් උන් දැල්ලට පිච්චිලා ජිවිතේ එතනම් ඉවර කරගන්නවා.
කුප්පි ලාම්පු තිබුනේ පොඩි විදුරු බෝතල් වලට මූඩිය හිල් කරලා බෙලෙක් පතුරක් රවුම් කරලා ගහලා එකෙන් රෙදි පටියක් රෝල් කරලා තිරේ විදියට ඇදලා ගෙදරම හදා ගනිපු ඒවා. එලිය නම් චිමිනි ලාම්පුව තරම් නැති වුනාට ලේසියෙන් එහා මෙහා ගෙනියන්න පුළුවන් නිසා කුස්සියේ හුඟක් වෙලාවට කුප්පි ලාම්පු තමයි පාවිච්චි කරේ. ලිප පත්තු කරන්නත් තෙල් ටිකක් ගත්තේ කුප්පි ලාම්පුවෙන්ම තමයි . ආරක්‍ෂිත කුප්පි ලාම්පු කියල තිබුනා බල්බ් එක කඩලා ඒකට බෙලෙක් පටි වලින් ෆ්‍රේම් එකක් දාල. අල්ලන්න කොක්කුත් එක්ක. තෝමස් අල්වා එඩිසන් ලාම්පුව වෙනුවට බල්බ් එක හැදුවම අපේ මිනිස්සු අයෙත් බල්බ් එක කඩලා එකෙන් ලාම්පුවක් හදලා.
රෑට පීල්ල ගාවට හරි වෙන මොකක් හරි එළියේ වැඩකට පාවිච්චි කරේ පන්දමක් , බෝතලේකට ලාම්පු තෙල් ටිකක් දාල පොල් මුඩ්ඩක් ගහනවා . සරින් සැරේ බෝතලේ අනිත් පැත්ත ගගහා පන්දම නිවෙන්න නොදී තියාගන්න ඕන , හුළඟට නිවෙන්නේ නැති නිසා ඒක ප්‍රයෝජනවත් වුනා එළියේ පාවිච්චියට. පාන්දර බස් එහෙකට පාරට යන්න වුනත් පාවිච්චි කරේ අපි ඒ වගේ පන්දමක්. යන ගමන් අරන් ගිහිල්ලා පාර ගාවදි කොහේ හරි අකුලක් අස්සේ ඔබලා යනවා. ආයේ රෑ වෙලා එන්න වුන දවසක් තිබුනොත් අරගන යනවා.
පැට්‍රොල්මැක්ස් එකක් හැම ගෙදරකම වගේ ඒකාලේ තිබුනා . අපේ ගෙදර දෙකක් තිබුනා හැබැයි වැඩ කරේ එකයි කොයි වෙලෙත් , මොකද මං ස්පෙයා පාර්ට්ස් වලට තමයි එකක් තියාගන තිබුනේ. ලයි එක පත්තු කරන්නේ ඉතින් කලාතුරකින් මොකද සාමාන්‍ය ලාම්පු වලට දවසකට යන ලාම්පු තෙල් ප්‍රමානෙට වඩා තුන් හතර ගුණයක් ලයිට් එකට යන හින්දා.
ලයිට් එකේ කොටස් කීපයක් අපේ වචන වලින් කිව්වොත් ටැංකිය නැත්තම් ගෙඩිය, පොම්පේ , හෙඩ් එක , පින් එක, මැටි කට්ටේ ,මැන්ටලේ , පියන . චිමිනිය .
ලයිට් එකේ චිමිනිය තනි වීදුරුවකින් නෙවෙයි හැදිලා තියෙන්නේ, වීදුරු පටි රවුමට තියලා යකඩ වළලු එකකින් උඩිනුයි යටිනුයි සම්බන්ද කරලා තියෙන්නේ. චිමිනි ලාම්පුවේ තරම් ඉක්මනට දැලි බැඳෙන්නේ නැති වුනාට එකත් සුද්ද කරන්න වෙනවා කාලෙකට සැරයක්, ලයිට් එක පත්තු කරන්න කලින් අලුතෙන් මැන්ටලයක් දාන්න වුවමනාය. අලුත් මැන්ටලය විනාකිරි වල පොඟවාලා මිරිකලා ගත්තම වැඩි කල් පාවිච්චි කරන්න පුළුවන් තාත්තලා කියනවා , මැන්ටලේ ගැට ගහන්න තියෙන්නේ මැටි කට්ටේට මැටි කට්ටේ කියන්නේ හිල් හිල් තියන මූඩියක් වගේ එකක් හෙද එකේ යට තමයි එක හයි කරලා තියෙන්නේ.
ලයිට් එකේ එලිය වැඩි නිසා සත්තු සැහෙන ප්‍රමාණයක් එනවා , හුඟක් උන් යන්නේ නෑ ලයි එකට උඩින් පියාඹන්න ගිහින් පිච්චිලා ඇතුලටම වැටෙනවා.
පොඩි ලන්තරුමකුත් ගෙදර තිබුනා එත් ලන්තෑරුම් වල එලිය අඩු නිසා පාවිච්චි වුනේ නෑ වැඩිය. මම උසස් පෙලට පාඩම් කරන කොට රෑට හිටපු මැටි ගෙදර තියාගත්තේ නම් ලන්තරුම , ලන්තරුමට සාපේක්ෂව තෙල් ගියේ සැහෙන්න අඩුවෙන් .
No comments:
Post a Comment